இந்த மீன்கள்… உங்களுக்காக!

மிக விரைவாக நீந்தக்கூடிய மீன் (sailfish) இது. இதன் விரைவு மணிக்கு 62 கல் (62 mph; 100 km/h) ஆகும். இந்த மீன் எட்டு அடிக்கும் கூடுதலாக வளரும்.

தென் அமெரிக்காவில்  நன்னீரில் வாழும் நான்கு அடி நீள மீன் (poraque) இது. இரையைப் பிடிக்கவும் தற்காப்புக்காகவும் தன் உடலிலிருந்து மின்சார ஆற்றலை வெளிப்படுத்தும் இயல்புடையது. 650 வாட் அளவு மின்சாரத்தை இதனால் வெளிப்படுத்த இயலும். விலாங்கு (electric eel) என்று பொதுவாகச் சொல்லப்பட்டாலும் உண்மையில் இது விலாங்கு அன்று.

தண்ணீருக்கு வெளியிலும் மூச்சிழுக்கும் (சுவாசிக்கும்) திறனுடைய மீன் (lungfish) இது. வாழும் சதுப்புநில நீர்நிலையில்  நீர் வற்றிவிட்டால் மண்ணைத் தோண்டிக்கொண்டு உள்ளே சென்றுவிடும் இந்த மீனால் மண்ணுக்குள் நான்கு ஆண்டு காலம் உயிர்வாழ முடியும். அப்போது தன் நுரையீரல்களைக் கொண்டு மூச்சிழுக்கும். ஆறு அடி ஐந்து அங்குலம் நீளம் வரை இந்த மீன் வளரும்.

எல்லா மீன்களும் குளிர் இரத்தம் உடையவையே என்றாலும் இந்த மீனினம்தான் (icefish) மிகுந்த குளிர்ச்சியான இரத்தம் உடையது. அண்டார்டிகாவைச் சுற்றியுள்ள கடலில் வாழும் இந்த மீனின் இரத்தத்தில் உறைதலுக்கு எதிரான ஆற்றல் (antifreeze) இயல்பாகவே உள்ளது. பிற மீன்கள் இறந்துபோகும் தட்பவெப்ப நிலையிலும் (0°C, 32°F) இந்த மீன் உயிர்வாழும். இரண்டு அடி நான்கு அங்குலம் வளரக்கூடியது இந்த மீன்.

நன்னீர் மீன்களுள் மிக மிக ஆபத்தான மீன் தென் அமெரிக்காவின் சில ஆறுகளுள் காணப்படும் பிரான்யா (piranha) ஆகும். எட்டு அங்குலம் முதல் ஓர் அடி நீளம் வரைக்கும் வளரக்கூடிய இந்த மீன் எப்போதும் கூட்டமாகவே திரியும் இயல்புடையது. ஒரு கூட்டத்தில் நூற்றுக்கும் மேற்பட்ட மீன்கள் இருக்கும். எதிர்பாராமல் ஆற்றில் விழும் குதிரை முதலிய விலங்குகளின் இறைச்சியைச் சில மணித்துளிகளில் ஒரு பிரான்யா மீன்கூட்டம் தின்று தீர்த்துவிடும்; மாந்தருக்கும் இதே நிலைதான்.

முட்டை இடும் உயிரினங்களுள் மிகுதியான எண்ணிக்கையில் முட்டை இடுவது இந்த மீன் (ocean sunfish) ஆகும். ஒரேவேளையில் முப்பது கோடி முட்டைகளை இடும். பதின்மூன்று அடி நீளம் வரை வளரக்கூடிய இந்த மீனின் எடை 2000 கிலோகிராமுக்கும் மிகுதியாகும்.

சுறாமீன்களுள் மிகச் சிறியது இது (dwarf lantern shark). முழுமையாக வளர்ந்தால் இந்தச் சுறா ஆறு அங்குல நீளம் மட்டுமே இருக்கும். அடிப்பாகத்தில் ஒளி உருவாக்கும் உறுப்பு உள்ளது.

நன்னீர் மீன்களுள் மிகச் சிறியதும் மிகக் குறைவான எடை கொண்டதுமான மீன் இது (dwarf pygmy goby). பிலிப்பைன்ஸ் நாட்டின் ஆறுகளில் காணப்படும் இந்த மீனின் நீளம் எட்டு மில்லிமீட்டர் (0.8 cm; ⅓ inches) ஆகும். எடை? 250 மீன்களைச் சேர்த்தால் ஒரு கிராம் எடை இருக்கும். (ஒரு மீனின் எடை நான்கு முதல் ஐந்து மில்லிகிராம் ஆகும்.)

நன்னீர் மீன்களுள் மிக நீளமானது அரபாய்மா (arapaima) ஆகும். தென் அமெரிக்க ஆறுகளில் வாழும் இந்த மீன் பதினான்கு அடி ஒன்பது அங்குல நீளம் வளரக்கூடியது. எடை இருநூறு கிலோகிராம் (440 பவுண்டு).

இந்த மீன் (Mekong giant catfish) நன்னீர் மீன்களுள் மிகுந்த எடை கொண்டது. இதன் நீளம் அரபாய்மா மீனைவிடக் குறைவுதான் என்றாலும் எடை மிகுதி ஆகும். முந்நூறு கிலோகிராம் (670 பவுண்டு) வரை எட்டும். (படத்தில் உள்ள மீனின் நீளம்: 9 அடி; எடை: 646 பவுண்டு). கம்போடியாவின் மீகோங் ஆற்றுப் பகுதியில் இந்த மீன்கள் வாழ்கின்றன.

இது திமிங்கிலச் சுறா (whale shark). மீன்களுள் இதுவே ஆகப் பெரியது.  46 அடி நீளம் வளரும். எடை பதினான்கு டன்னுக்கும் (14,000 கிலோகிராம்) மிகுதி ஆகும்.

- அ. நம்பி