சகுனம் நல்லதென்று விடிய விடியத் திருடலாமா?

அவன் இளைஞன்; அகவை இருபத்திரண்டு ஆண்டு; நார்வே நாட்டினன்.

டென்மார்க்கில் இருந்து படகுப் பயணம்; நார்வேயில் கிறிஸ்டியன்சாண்ட் என்னும் துறைமுக நகரில் இறங்கினான்.

வழக்கமான சோதனைக்காக ஆயத்துறையினர் (சுங்கத்துறையினர்) அவனைத் தடுத்து நிறுத்தினர்; சோதித்தனர்.

அவன் கொண்டுவந்த பையில் ஒரு சிலந்தி இருப்பதைக் கண்டுபிடித்தனர். அது தராந்துலா (tarantula) என்னும் வகையைச் சேர்ந்த மிகுந்த நஞ்சுள்ள சிலந்தி.

சிலந்தியைக் கண்டதும் ஆயத்துறையினருக்கு அந்த இளைஞன்பால் ஐயம் தோன்றியது; அவனை முழுமையாகச் சோதிக்க முடிவு செய்தனர்.

மார்பைச் சுற்றிப் பதினான்கு காலுறைகளைப் பிணைத்திருந்தான். ஒவ்வொரு காலுறையினுள்ளும் ஒரு சிறிய மலைப்பாம்பு! மொத்தம் பதினான்கு மலைப்பாம்புகள்!

அதிர்ச்சி அடைந்த ஆயத்துறையினர் அவன் காற்சட்டையைக் களையப் பணித்தனர்.

இரு கால்களிலும் பத்துத் தகரச் சிமிழ்கள்; சிமிழ்களில் பத்துப் பல்லிகள் (albino leopard geckos).

`திறமை மிகுந்த’ அந்த இளைஞனை யாரும் பாராட்டவில்லை; கிறிஸ்டியன்சாண்ட் காவல் துறையினரால் தடுத்து வைக்கப்பட்டுள்ளான்.

தண்டம் (அமெரிக்க வெள்ளி: $2,256; மலேசிய ரிங்கிட்: MR7,963) கட்ட ஒப்புக்கொண்டால் அவனை விடுவிப்பார்கள்.

`திறமை’க்குத் தண்டமா…?

- அ. நம்பி